CEBU, Philippines - Upat ka mga sakop sa media sa dakbayan sa Talisay ang mokandidato sa umaabot nga eleksiyon sa barangay karong umaabot Oktubre 25, 2010.
Ang nahisgutang mokandidato mao si Jonathan Tumulak sa Sun Star Super Balita kinsa modagan isip kapitan sa barangay Lawaan I.
Si Tumulak kinsa maoy kanhi first councilor sa nahisgutang barangay maoy mipuli karon sa pwesto isip kapitan human ang kanhi kapitan nga si Jerson Laceda mitaliwan.
Ubos sa grupo ni Tumulak, si Vincie Monterde sa Sun Star Super Balita kinsa modagan isip kagawad sa barangay.
Sa barangay Poblacion si incumbent councilor Gabriel Bonjoc sa Cebu Daily News ug ang tigbalita sa The Freeman nga si Liv Campo ang modagan isip kagawad sa maong barangay.
Ang maong mga sakop sa media parehong ubos sa landong sa administrasyon.
Sa laing bahin, kagahapon sa buntag ang buhatan sa Comelec sa Talisay naghuot tungod kay nagkadungan sa pagduso sa ilang Certificate of Candidacy (COC) ang grupo sa administrasyon ug oposisyon.
Ang incumbent nga kapitan sa barangay Poblacion nga si Teodoro “Balo” Belleza nga nahinabi sa Banat News nagkanayon nga wala sila mag-agad sa regla o pagtuo-tuo, kay kagahapon maoy gikasabutan sa ilang grupo sa pagduso sa ilang COC.
Kagahapon ang gitawag og “perfect 10” tungod kay ang buwan sa Oktubre ika-napulo kining buwan sa tuig, ug 10 usab ang petsa kagahapon, sa tuig 2010.
Ang mga matuo-tuohan nagtuo usab nga ang nahisgutang buwan, petsa ug tuig swerte tungod kay pulos pasaka ang pagsuwat sa numero sama niadtong petsa otso.
Gibutyag ni Belleza nga ubos siya sa landong sa Liberal Party, busa si kanhi Bise Mayor Aberdovey Belleza misuporta kanila karon, kay misuporta usab siya niini niadtong piniliay sa milabay’ng Mayo apan wala lay suwerte kay napilde.
Kahinumdoman nga ang nakaparot kang Belleza mao si Bise Mayor Allan Bucao .
Gi-awhag ni Belleza ngadto sa iyang kaatbang nga “may the best man win, dili magpadala sa kainit sa mga suporter kay kini maoy kasagarang magpasiugda og painit”, matud pa ni Belleza.
Ang asawa ni Talisay City Councilor Val Ylanan nga si Ofelia miatbang kini karon sa ilang last termer nga kapitan nga si Reynaldo Sedentario sa barangay Linao.
.Ang grupo ni Ofelia ubos karon sa landong sa LP apan matud pa niya nga pareho silang tanan og tumong nga mao ang paghatag og kaayohan sa mga molupyo sa ilang barangay.
Si Dory Emit ang mikandidato isip konsehal sa siyudad niadtong milabay’ng eleksiyon apan naparot ug mikandidato karon isip kapitan sa ilang barangay sa Pooc ug ubos usab kini sa LP.
Matud ni Emit nga gusto niyang adunay kausaban ug kalamboan ang ilang barangay. (BANATNEWS)