1-anyos gibuboa'g usa balding tubig

CEBU, Philippines - Usa ka giingong hubog nga lalaki ang nag-atubang og kasong slight physical injuries human niya giingong gibubo-an og usa ka balding tubig ang usa ka tuig nga bata nga anak sa iyang silingan samtang natulog sa kawayan nga lingkuranan sa sitio Kalubihan, Upper Calajo-an, lungsod sa Minglanilla sa miaging semana.

 Ang suspetsado mao si Alioser Orjaleza, 44, nga taga Upper Calajo-an kinsa gipasakaan na og kaso ngadto sa Korte sa mga tagtungod sa batang lalaki nga maoy biktima.

Ang inahan sa biktima nga si Mary Anne Cartalaba, 21, residente usab sa maong dapit mibutyag nga niadtong Oktubre 4, 2010 sa alas 4:00 sa hapon gidala niya ang iyang anak sa usa ka payag duol sa ilang balay aron pakatulgon sa lingkoranan nga kawayan.

Dihang nakatulog na ang bata si Orjaleza kinsa hubog mitungha ug gimandoan si Cartalaba nga papahawaon sila sa payag apan wala lang kini panumbalinga sa naulahi tungod kay natulog ang iyang anak.

Aapan nakurat si Cartalaba dihang gibuboan gyud sa hubog og usa ka balding tubig ang iyang anak busa naglisod sa pagginhawa ang bata ug mipusnga dihang nasudlan og tubig ang baba ug ilong.

Ang maong hitabo gi-report ni Cartalaba ngadto sa Minglanilla Police Station kinsa maoy misikop sa suspetsado. (BANATNEWS)