Magtiayon girakrakan, bana patay

CEBU, Philippines - Patay nang nadangat ngadto sa tambalanan ang usa ka 39-anyos nga manuroyay og pustiso samtang ang iyang asawa naangol human sila pamusila sa duha ka wala mailhing mga lalaki kagahapon sa buntag diha sa ilang balay sa sitio Riverside, barangay Poblacion Oriental, lungsod sa Consolacion.

Ang mga biktima mao ang magtiayong Dionesio ug Emma Sarsalejo, 32, nagpuyo sa nahisgutang dapit.

Ang mga mamumuno duha ka wala mailhing mga lalaki nga nagsakay og usa ka Yamaha Neo nga motorsiklo nga kolor puti ug puwa.

Si PO1 Adonis Terania, duty desk officer sa Consolacion Police Station sa pakighinabi niini sa Banat News kagahapon nagkanayon nga niadtong Huwebes sa alas 4:20 sa hapon si Dionesio nakadawat og death threats sa text message nga nagkanayon “hoy gago kung kinsa ka man magdasal ka na darating na ang oras mo!”

Kagahapon sa buntag ang nahisgutang mga lalaki kalit nga mibutho sa ilang dapit ug misulod sa balay sa magtiayong Sarsalejo ug dayong pamusil.

Matud ni Terania nga si Dionesio nakaangkon og mga samad pinusilan sa iyang lawas nga maoy gituohang hinungdan sa iyang kamatayon samtang si Emma nakaangkon og usa ka samad pinusilan sa tuo niyang abaga.

Ang duha daling gidala sa Eversely Child SanItarium Hospital apan gideklarar nga patay si Dionesio samtang daling gibalhin sa Vicente Sotto Memorial Medical Center ang asawa niini. Sila si PO3 Alez Sialona, PO1 Nilson Lech Suico ug PO1 Jeffrey Capangpangan ang miresponde sa maong hitabo wala makuhai og dugang pamahayag kabahin sa maong pagpamusil.

Si Terania midugang nga mipahigayon pa sila og follow-up nga imbestigasyon sa maong hitabo. – BANAT NEWS