CEBU, Philippines - Kritikal ang kondisyon sa duha ka mga lalaki human kini panunggaba sa managlahing dapit ug oras sa dakbayan sa Lapulapu sa milabay’ng adlaw.
Ang mga biktima mao si Ryan Pino y Trajano, 25 ulitawo, lumad nga taga lungsod sa Ubay, lalawigan sa Bohol ug kasamtangan nagpuyo sa Lapulapu, ug Roy Dungog y Padin, 21, ulitawo nga taga Poblacion, sa maong dakbayan.
Ang gitumbok nga miluba kang Pino mao si Panfilo Calunod alyas Tata nga silingan ni Trijano, ug ang suspetsado usab nga midunggab kang Dungog mao si Olmar Premacio, silingan sa naulahi.
Sa imbestigasyon ni SPO2 Rolito Jumao-as ug PO1 Junard Cinco nasuta nga samtang alegre ang grupo ni Pino gumikan sa pagsaulog sa piyesta sa ilang dapit kalit lang miabot si Calunod.
Nakurat ang tanan sa dihang kalit nga giluba niini ang biktima, ug mao gihapon sa kaso ni Dungog kinsa nakapakurat sa mga namistahay dihang gihansakan og kutsilyo ang iyang tiyan.
Ang duha ka biktima gihatod dayon ngadto sa Vicente Sotto Memorial Medical Center samtang ang mga miluba kanila pulos gipangita pa sa kapolisan human kini manibat. – BANAT NEWS