Polis nagmaoy sa ferry boat

CEBU, Philippines - Natanggong ang usa ka polis nga nadestino sa lungsod sa Medellin human kini gi-alarma nga nagdala og armas ug naghubo sa iyang sapot sulod sa usa ka ferry boat gikan sa dakbayan sa Danao padulong sa Isabel, Leyte niadtong Miyerkules sa buntag.

Ang polis (pangalan gipugngan) 37-anyos kasamtangan nga nadestino sa Medellin Police Station gitanggong na karon sa karsel sa kapolisan sa maong lugar.

Sa pakighinabi sa mga tigbalita sa hepe sa kapolisan sa lalawigan sa Sugbo, Sr. Supt. Erson Digal mibutyag kini nga pasado alas-7 sa miaging buntag nakadawat siya og impormasyon gikan sa Pingag Patrol Base sa Regional Public Safety Battalion sa Rehiyon -8 kalabot sa nahitabo sa maong polis.

Matud pa ni Digal nga ang chiefmate sa Melrivic 3 Ferry nga gikan sa syudad sa Danao mireklamong samtang sila naglawig padulong sa Isabel, kalit nga nagkagubot ang mga pasahero.

Dihang ilang gisusi mao nalay ilang nakit-an ang maong polis nga nagdala og armas nga hubog ug wala nay sapot hinungdan nga mi-radyo ngadto sa Isabel, Leyte kabahin sa maong armadong tawo ug buot nilang magpasugat sa pantalan sa Isabel.

Pagdunggo sa maong ferry boat sa pantalan sa barangay Matlang, Isabel, Leyte gisikop kini. Diha nalang nahibaw-an nga usa siya ka polis ug diha-diha gidisarmahan sa iyang .9mm pistol nga adunay 12 ka buhing bala ug laing 20 ka bala sa kalibre .45.

Matud pa ni Digal nga nakurat siya sa maong balita ug mimando na og imbestigasyon sa nahitabo, giingong walay clearance gikan sa ilang labaw nga kini mogawas sa Sugbo.

Samtang sa iyang bahin, si Supt. Bonifacio Arreisgado nga nahinabi sa Banat News mibutyag nga wala siya magdahom nga mahimo kini sa iyang tawo. Matud pa niya nga gisugo niya kini sa pagpahigayon og surveillance kalabot sa ilegal nga drugas ug ilegal nga sugal.

Apan nakurat nalang siya dihang gitawgan sa maong sakop ug gipahibalo nga na-detain kini sa Isabel apan wala kaayo masayod si Arreisgado sa mga detalye human naputol ang ilang panag-estorya.

 Gihulagway ni Arreisgado nga maayo kining tawo apan dako ang pagduda niya nga nadala kini sa barkada ug nangahubog ug nakasakay sa maong ferry boat.

Apan bisan paman ilaha kining kasuhan tungod sa Comelec gun ban ug ang absence without official leave (AWOL) niini sa iyang trabaho.

Samtang si Digal mipuno nga mag-atubang pa og laing kasong administratiba ug alarm and scandal ang maong polis ug dako ang puruhang matangtang kini sa serbisyo.

“This would served as a warning to all police officers assigned at Cebu Provincial Police Office (CPPO) nga kun mo-inom man gani ta kinahanglan nga ibutang gyud nato sa tiyan ug dili sa ulo,” pahimangno pa ni Digal. – BANAT NEWS