Bagol-bagol natapsingan sa bala

CEBU, Philippines - Napaksit ang bagol-bagol sa usa ka tawo dihang natapsingan kini sa bala sa armas sa iyang silingan nga miboto dihang giilogan kini sa amahan ug anak didto sa sitio Bohol-Bohol, barangay Looc, dakbayan sa Mandaue sa miaging gabii.

Ang biktima mao si Angelito Torremocha, 43, minyo, samtang ang mga suspetsado mao si Jesus Torrejos, 68, biyudo, ug ang anak niini nga si Jose Torrejos, 22, ulitawo, nga pulos taga Looc.

Si SPO2 Danilo Ibarreta sa kapolisan sa Presinto 5 nga nagbase sa barangay Opao, nga nahinabi sa Banat News miingon nga nahubog ang anak nga si Jose ug nagwaldas samtang nagtangkil sa iyang .38 kalibreng armas de fuego.

Dihang nakita sa iyang amahan buot unta niining kuhaon ang armas sa iyang anak nga lasbag apan wala kini ihatag sa naulahi hinungdan nga naglinayogay sila hangtod nga kalit nga mibuto ang maong revolver.

Si Torremocha kinsa silingan sa amahan ug anak nakurat nalang dihang human sa buto, mibuhagay ang dugo gikan sa iyang ulo kay didto diay puntariya ang bala sa mibutong armas sa batan-ong Torrejos.

Dali nga gidala ang biktima sa Mandaue City District Hospital apan gibalhin kini sa Vicente Sotto Memorial Medical Center sa dakbayan sa Sugbo.

Matud pa ni SPO2 Ibarreta nga ang amahan ug anak nga gikuyawan sa maong hitabo dali usab nga nanghipos sa ilang mga sinina ug nagkuyog sa pagsibat pahilayo sa maong dapit ug wala maabti sa mga polis nga mitubag sa maong alarma. – BANAT NEWS