Jail Guard sa CPDRC gisuspenso

CEBU, Philippines - Mipagawas og kamanduan ang gobernadora sa lalawigan sa Sugbu nga nagpaubos sa usa ka jail guard sa Cebu Provincial Detention and Rehabilitation Center (CPDRC) sa 90 ka adlaw nga preventive suspension tungod sa pag-eskapo sa usa ka piniriso human sa hearing sa korte sa dakbayan sa Lapu-lapu niadtong adlaw nga Lunes petsa 5 ning bulan sa Oktubre.

Ang gisuspenso sulod sa tulo ka bulan nga walay madawat nga suweldo mao si Provincial Jail Officer 1 Roberto Cabanag nga maoy nagbantay sa nakaeskapong piniriso nga si Alex Agbo, lumad nga taga lungsod sa Cordova ug nag-atubang og kaso sa ilegal nga drugas.

Sumala pa ni Atty. Lito Astillero, pangulo sa Committee on Discipline and Investigation (CODI) gipirmahan ni Gob. Gwendolyn Garcia ang preventive suspension order ug ilaha nang gihatud kagahapon sa hapon sa CPDRC.

 Matud pa ni Astillero nga gawas sa maong suspension, gisugdan na usab niya ang pag-imbestigar kang Cabanag alang sa posibleng kriminal ug administratibang kaso.

Si Astillero nagkanayon nga sa pasiunang impormasyon nga ilang nahipos, si Cabanag makaduha na ka higayon nga mitugot sa hangyo ni Agbo nga mouli sa ilang panimalay sa lungsod sa Cordova bisan og walay court order.

Sa unang higayon si Agbo mibalik ngadto kang Cabanag apan sa ikaduhang higayon wala na kini mobalik pa ug padayon pa kini nilang gipangita hangtud niining mga higayona.

Sigon pa ni Astillero nga apil sa ilang imbestigahon mao ang Jail Warden nga si Alger Comendador tungod sa command responsibility ug may daghan kining ipasabot sa ilang imbestigasyon.  – BANAT NEWS