Rotation brownout himuong 3 ka oras -VECO

CEBU, Philippines - Mas misamot kalapad ang nasinati nga brownout sa Metro Cebu Area kagahapon adlawa human gipatas-an ug gihimong tulo na ka oras ang gipatumang rotation brownout sa Visayan Electric Company (VECO).

Daling gipasabot sa tigpamaba sa VECO Ethel Natera dihang nahinabi sa Banat News nga ang pagdugang og usa ka oras gikan sa duha ka oras nga rotation brownout sugod kagahapon sa buntag gitumong aron dili na magbalik-balik ang pagkapawong sa usa ka lugar sulod sa usa ka adlaw.

Kini epekto gihapon sa padayung pagkulang sa suplay sa kuryente sa ilang franchise area tungod sa wala pa gihapon makabalik sa full operation ang duha ka generators sa Cebu Energy Development Corporation (CEDC) ug ingon man ang pagkaguba sa ubang mga planta nga nag-suplay og kuryente dinhi sa Visayas nganha sa VECO.

Ang mga lugar nga nakasinati og brownout kagahapon sayo sa buntag mao ang Calamba, Punta Princesa, Sambag-1, Sambag-2, Labangon, Buhisan, Tisa, Mabolo, North Reclamation Area, Barrio Luz, Hipodromo, Kasambagan, Sta Cruz, Guadalupe, Ayala, Capitol Site, Kamputhaw, Pardo, Quiot, Basak, Kinasang-an, Bulacao, Tabunok, Lawaan ug dakung bahin sa Talisay City.

Samtang apil sa nakasinati og brownout ang dakung bahin sa syudad sa Mandaue ingon man sa mga lungsod sa Consolacion ug Lilo-an.

Niadtong miaging adlaw milanat og duha ka oras ang rotation brownouts. Ang VECO nagkinahanglan og 300 megawatts alang sa franchise area niini apan menus kaayo ang kuryenteng miabot kanila ning nanglabay’ng adlaw. – BANAT NEWS