Konduktor gi-agtang pagpusil namatay

CEBU, Philippines - Patay ang usa ka konduktor nga gipusil sa usa ka lalaki alas-3 pasado ang takna kagahapon sa kaadlawon sa karaang terminal sa dakbayan sa Lapulapu.

Ang namatay mao si Mario “Mayong” Hibaya, lumad nga taga lalawigan sa Bohol ug temporaryong nagpuyo sa nahisgotang dapit.

Samtang gisubay na sa kapolisan kun si kinsa ang mamumuno nga giingong usa gihapon ka drayber sa jeep pasaheroan sanglit nailhan kini sa mga testigo

Sa imbestigasyon nga gihimo ni SPO2 Rolito Jumao-as sa Homicide Section sa kapolisan sa maong dakbayan giingong nakig-inom pa ang biktima sa iyang mga higala sa nahisgotang dapit niadtong tungura.

Gikatahong nahiagi ang mamumuno diha sa maong dapit ug gisampit kini sa biktima apan giingong nasuko kini ug kalit nga mipusil kang Hibaya. Sa report sa Buena Mano kagahapon, usa sa mga testigos nga miingon nga gitubag sa mamumuno ang biktima nga padulong sila sa ‘impiyerno” ug buot ba kining mokuyog ug diha-diha gipusil niini ang biktima.

Ang biktima naigo sa agtang nga nakaingon sa iyang hinanaling kamatayon ug wala na madala pa sa tambalan.

Matud pa ni Jumao-as sa susamang report nga aduna nay karaang panagbingkil ang biktima ug ang mamumuno. (BANATNEWS)