CEBU, Philippines - X Masaligon ang gobernadora sa lalawigan sa Sugbu nga dili magpadala sa ‘hulhog’ ni Cebu City South District Congressman Tomas Osmeña si Interior Secretary Jesse Robredo kinsa mipakita og pagsupak karon sa tinguhang mahatagan og kasulbaran ang problema sa 93-1.
Sumala pa ni Gob. Gwen Garcia nakita niya ang kasinsero ni Robredo sa paghatag og kasulbaran sa maong problema gawas lamang kun ang baruganan ni Mayor Michael Rama susama ni Osmeña.
Gipahibawo ni Garcia nga si Robredo nakakita na sa kinatibuk-ang nahimo sa Kapitolyo ug dako ang iyang pagtuo nga makatarunganon ug neutral ang paagi sa pagsulbad niini sa maong problema.
Si Robredo gikatakdang mobalik dinhi sa Sugbu karong sunod semana aron makasugod sa himuong aksyon sa Malacañang ilabina sa kapin sa 11 na ka tuig nga lugway sa mga okupante sa pagbayad sa lote sukad niadtong tuig 1993.
Giklaro sa gobernadora nga sa 467 mil ka metro kwadradong lote sa Kapitolyo kapin sa 125 mil metro kwadrado lamang ang nabayran, samtang ang 331 mil ka metro kwadrado na-forfiet pabor sa lalawigan.
Sigon sa appraisal sa Kapitolyo ang balor sa maong lote moabot na og kapin sa P2 bilyones sanglit nahimutang man kini nga commercial area. (BANATNEWS)