CEBU, Philippines - Patay ang usa ka 6-anyos nga batang lalaki ug naangol usab ang lola niini human madasmagi og motorsiklo atol sa ilang paglabang sa karsada diha sa barangay Liong sa lungsod sa Dumanjug niadtong Domingo sa sayong gabii.
Ang patay nang nadangat sa tambalanan mao si Paul Raymund Aninon, 6, molupyo sa nahisgutang lugar samtang naangol usab ang iyang apohan nga si Marcela Aniñon, 75.
Padayon pa ang kapolisan sa pag-ila sa drayber sa motorsiklong Kawasaki nga kolor puwa, nga walay plate number human kini misibat pahilayo.
Apan sa gihimong follow up sa kapulisan nailhan na ang tag-iya niini nga taga Balay’g Tiki sa lungsod sa Dumanjug ug nakuha sab ang plate number niini.
Matud ni SPO1 Raymundo Sala sa Dumanjug Police Station dihang nahinabi sa Banat News , ang motorsiklo gikan sa habagatang bahin ug kusog kaayong nagpadagan paingon sa Dumanjug ug pag-abot sa maong lugar naatol nga nabuhian ni Aniñon ang biktima atol sa ilang pagtabok sa karsada hinungdan nga kini napunggit sa motor.
Si Aniñon kinsa misuway paggukod sa bata naapil sa naigo sa maong motorsiklo hinungdan sa pagkatumba niini ug wala na kini nahimo dihang naguyod ang apo sa maong motorsiklo, dihang natangtang ang bata mipasutoy dayon ang drayber palayo.
Ang duha daling gihatud sa Barili District Hospital apan gideklarar nga dead on arrival ang bata samtang ang apohan niini nakaangkon og mga samad sa walang batiis.
Ang kapulisan padayun pang nag-imbestigar sa hitabo apan sa pasiuna nilang nakuhang impormasyon ang tag-iya sa maong motorsiklo giingong nangangkon nga adunay migamit sa iyang motorsiklo nga wala mananghid niadtong tungura. (BANATNEWS)