Negosyante giulo pagpusil

CEBU, Philippines - Usa ka tag-iya’g junk shop napalgang patay nga may samad pinusilan sa ulo didto sa pinuy-anan niini sa sitio Upper San Roque, V. Rama Avenue, sa barangay Guadalupe ning siyudad sa Sugbo kagahapon sa buntag.

Si Wilfredo Cañada, 47, minyo, nga taga V. Rama, kanhi seaman ug nanag-iya’g junk shop, napalgan sa iyang 16 anyos nga anak dalagita nga si Cherylene nga may samad pinusilan sa tuong bahin duol sa iyang tampihak.

Si Cherylene mibutyag sa Banat News nga alas 6:00 kagahapon sa buntag nanaog siya kay maligo, dihang nakurat siya pagkakita nga naglingkod pa sa bangko nga puthaw ang iyang amahan duol sa hagdanan nga patay na ug may pinusilan sa ulo.

Matud pa niya kagahapon pasado alas 4:00 sa kaadlawon nakadungog siya nga morag may nabuak apan wala lang niya kini panumbalinga kay naandan naman sa iyang amahan nga manimbang og scrap iron kada kaadlawon kun dunay magpatimbang.

Apan ang laing anak sa biktima nga si Gwendolyn, 24, nga nahinabi sa Banat News nagkanayon nga gisultihan siya sa iyang amahan nga nakadawat kini’g hulga sa kinabuhi kapin usa na ka semana ang nakalabay.

Matud ni Gwendolyn nga wala na hinuon i-detalye sa ilang amahan kun unsang klase sa hulga ang nadawat niini ug si kinsa usab ang nanghulga. Napunitan sa mga sakop sa Crime Scene Investigation (CSI) ang usa ka slug sa .45 nga kalibre nga armas ug mao kini ipailawom sa ballistic examination aron pagsuta kun naghikog ba si Cañada o kaha gipatay siya sa wala hiilhing tawo. - Rey B. Pasaporte (BANAT NEWS)