Sunog sa Sambag 1, P18 milyones danyos

CEBU, Philippines - Mokabat sa P18 milyones ang gibanabanang danyos sa sunog nga miigo sa duha ka mga sitio sa barangay Sambag I, ning dakbayan kagahapon sa buntag human gilamoy sa kalayo ang dili mominos usa ka gatos ka pinuy-anan lakip na ang mga boarding house, apartment ug ingon man bahin sa Southwestern University (SWU).

Daling gisuspenso sa tagdumala sa SWU ang tanang klase ug gimanduang pagawason ang tanang magtutudlo ug mga tinun-an, ilabi na sa engineering ug maritime department.

Nadawat sa kabomberohan ang alarma alas 9:10 ug nakontrolar sa kabomberohan paglabay sa usa ka oras nga gipaubos sa Task Force Charlie. Adunay mirespondeng mga firetruck gikan sa lungsod sa Argao ug siyudad sa Danao.

Ang apektadong lugar nga nasunog mao ang sitio Atis ug sitio Upper Cawayan sa maong barangay.

Si SFO1 Nilo Daculan, imbestigador sa City Bureau of Fire Protection nga nahinabi sa mga tigbalita mitug-an nga subay sa nahipos nga impormasyon nagsugod ang sunog sa balay sa usa ka Caridad Sanchez diin ang balay niini ginama lang sa light materials nga nahimutang sa sitio Atis.

Matud ni Daculan nga mohimo pa sila og dugang pakisusi sa maong hitabo sanglit wala pa niya nahinabi si Sanchez hinungdan nga dili pa nila matumbok kun unsay hinungdan sa maong sunog.

Dugang pa ni Daculan nga mokabat sa 50 ngadto sa 60 ka panimalay ug gibanabana usab nga 40 ka panimalay ug estraktura ang hingpit naugdaw sa sitio Upper Cawayan nga naglakip sa engineering ug maritime department sa SWU.

Subay niini, si Daculan miingon nga tungod sa kadako sa damage sa SWU miabot og P18 milyones ang danyos ug posible pang mosaka ngadto sa P20 milyones sanglit nagpadayon pa sila sa pag-ihap sa mga apektado sa sunog atol ning pagsuwat ning balita kagahapon sa hapon.

Matud ni Cebu City Fire Marshal Supt. Esmael Codilla nga tungod sa kakusog sa hangin napalid ang mga nagbagang aligato sa mga balay ug maoy hinungdan nga daling nakatapon sa ubang kabalayan.

Ang kahagip-ot sa agianan ug kadaghan sa mga tawo nga nanguryoso sa sunog gipasanginlan usab nga maoy hinungdan nga nagkalisod pagsulod ang mga bombero pagpalong sa kalayo.

Giklaro ni Codilla nga walay nangaguba nga firetruck ug walay nasamdan sa mga sakop sa bombero sa maong alarma, apan ila pa karong gisusi ang taho nga dunay usa ka tinun-an nga naangol.

Si Mayor Michael Rama kinsa nangunay’g susi sa nasunogan nagkanayon nga nagkinahanglan gyud og dugang kahimanan ang mga sakop sa kabomberohan alang sa pagresponde sa sunog.

Si Codilla sa dihang nakit-an sa mayor gihanaan og dukol ang ulo niini human dugay kining nakit-an. Si Codilla mirason ngadto sa mayor nga nadugay siyag abot sa fire scene gumikan kay didto siya sa Department of Interior and Local Government (DILG-7) nanghulam og fire ladder.

Giangkon sa mayor nga kulang gyud og kahimanan ang kabomberohan, kini sama sa fire ladder ug uban pa.

Gani iyang gipadayag nga dako niyang kalipay nga anaa sa Sugbo kagahapong adlawa si DILG Sec. Jesse Robredo.

Matud ni Rama nga kun hatagan siya og kahigayonan nga iyang mahinabi si Robredo, iyang ipadangat ang nag-unang suliran sa kabomberohan dinhi sa dakbayan sa pamasin nga magahinan kini og budget ni Pres. Benigno Simeon Aquino III aron ikapamalit og dugang kahimanan. (BANAT NEWS)