Nagkanta gipusposa'g botelya angol

CEBU, Philippines - Duha ka tawo lakip na ang usa ka menor de edad nangasamad human bunali og botelya samtang nagkanta-kanta sa usa ka videokehan didto sa barangay Poblacion sa dakbayan sa Talisay niadtong Sabado sa gabii.

Ang mga biktima mao sila si Daniel Ranza, 21, ug Ervin Michael Divina, 17, pulos taga 3rd Street Carmen Village, barangay Poblacion.

Samtang ang suspetsado giila lang sa ngalan nga “Norman” nga taga sitio Roja Luca, barangay Poblacion.

Si PO2 Narciso Alforque, duty desk officer sa Talisay City Police Station sa pakighinabi sa Banat News kagahapon mibutyag nga ang mga biktima ug suspetsado pulos nag-inom sa usa ka imnanan sa Poblacion kinsa giingong parehong lasbag.

Si Ranza giingong mikanta sa videoke ug samtang nagkanta kini miduol si Norman ug sa wala’y rason gibunalan sa basiyong botelya sa bino ang ulo sa biktima.

Si Divina kinsa diha duol ni Ranza napiskan sa mga bildo sa napusgay nga basiyo hinungdan nga nangasamad ang dagway niini.

Si Alforque nagkanayon nga ilang gituohan nga posibleng si Norman wala makauyon sa pagkanta sa biktima hinungdan nga gipareglahan kini sa suspetsado.

Apan wala mahibaw-i sa mga polis kung unsay gikanta ni Ranza nga usa sa hinungdan sa kasuko sa suspetsado. Kasagarang awit nga daghang nagbuno mao ang My Way. (BANAT NEWS)