Wa pay mi-file og COC sa Talisay
CEBU, Philippines - Ang buhatan sa Commission on Elections (Comelec) sa dakbayan sa Talisay wala pay nadawat nga certificate of candidacy (COC) niadtong Biyernes, Oktubre 1, gikan sa mga mokandidato alang sa election sa barangay ug Sangguniang Kabataan (SK) karong Oktubre 25.
Si Hazel Bathan, election assistant nga nahinabi sa Banat News mibutyag nga ang pagsang-at og COC gitakda gikan sa Oktubre 1 hangtod sa Oktubre 13.
May katahap ang taga Comelec nga unya na usab sa Oktubre 13, ang katapusang adlaw sa pagsang-at og COC, magdasok sa ilang buhatan ang mga mosang-at niini.
Gibutyag ni Bathan, nga sugod Oktubre 14, hangtud sa Oktubre 23, maoy gitugot nga panahon alang sa pangampanya.
Ang mga gikinahanglan sa mokandidato mao ang tulo ka kopya sa COC nga notaryado, adunay mga documentary stamp ug tulo ka kopya sa 2x2 nga ID photo sa hingtungdan.
Si Corazon Moran ang election officer sa Talisay nagkanayon nga andam na ang ilang buhatan karon alang sa umaabot nga eleksiyon.
Matud niya nga wala sila makasinati og mga problema sa ilang pagpangandam tungod kay misuporta man ang lokal nga kagamhanan sa siyudad bahin sa uban nilang panginahanglanon, sama sa supply sa papel nga ilang giimprintahan sa mga ngalan sa kandidato.
Ang mga kandidato dili pweding makasuroy-suroy sa ilang mga silingan aron magpaila-ila sa ilang tuyo, kung wala pa ang adlaw sa pagpangampaniya, matud pa ni Moran. (BANAT NEWS)
- Latest
- Trending
