Manager Tipi Sa Ambush

CEBU, Philippines - Patay nang nahidangat sa tambalanan ang 49-anyos nga division manager sa Taiheiyo Cement nga nahimutang sa lungsod sa San Fernando human kini banhigi sa duha ka wala mailhing mga lalaki nga sakay sa usa ka kolor pula nga motorsiklo niadtong Sabado sa gabii sa Mansueto Subdivision, barangay Bulacao, dakbayan sa Talisay.

Ang namatay sa pagpamanhig mao si Ernesto Silverio Porras, samtang naangol ang iyang asawa nga si Ceferina Mar Porras, 47.

Si SPO3 Joel Wenceslao, residente sa lugar maoy mi-report sa hitabo ngadto sa Talisay City Police Station.

Base sa pasiunang imbestigasyon nila ni PO3 Alfredo Cuizon, PO2 Henry Mata ug PO1 Rusty Pelayo nga ang magtiayong Porras sakay sa ilang Kia Sorento (YAZ-160) uban sa ilang anak nga si Joyce Ethel, 14, ug duha ka katabang nga sila si Catherine Hellecenia ug Diary Dumada-ug.

Ang anak ug duha ka katabang naglingkod sa back seat, samtang si Ernesto Silverio maoy nagmaneho sa sakyanan ug tupad niya sa front seat si Ceferina Mar.

Atol sa hitabo, ang asawa ni Ernesto Silverio, anak ug ang duha ka katabang nakatulog samtang sila nagbiyahe.

Gikan sila sa ilang tindahan sa N. Bacalso Avenue, dakbayan sa Sugbo paingon na mamauli sa Friendly Homes Subdivision, Bulacao, Talisay sa dihang naabot sa main road sa Mansueto Subdivision miduol ang nag-atang nang daan nga mga mamumuno.

Ang angkas sa motorsiklo maoy mihulbot og automatic pistol dayong rakrak ngadto sa sakyanang gisakyanan sa mga biktima. Si Ernesto Silverio nakaangkon og mga samad pinusilan sa iyang likod, tuong bukton, usa sa tuong dughan, tuong abaga ug walang abaga. Samtang ang iyang asawa nakaangon og samad pinusilan sa tuong bahin sa dughan.

Ang mga biktima gidala sa Chong Hua Hospital sa ilang mga silingan apan samtang nagbiyahe sila nakabsan sa kinabuhi si Ernesto Silverio.

Ang anak ni Ernesto Silverio ug ang duha nila ka katabang swerte kay wala kini maigo sa mga bala.

Na-recover sa mga polis sa lugar nga nahitaboan ang 10 ka mga kabhang sa bala sa .9mm. Wala pa mahibaw-i sa kapolisan ang motibo sa pagpamanhig sa mga Porras.

Kahinumduman nga niadtong Hunyo ning tuiga, ang marketing manager sa nahisgutang kompaniya nga si Nestor Zamora gibanhigan sa duha ka mga lalaki nga sakay og motorsiklo sa Ayala Access Road, dakbayan sa Sugbo apan napalpak tungod kay wala kalapos ang bala ngadto sa sulod sa Ford Everest (YBH-309) nga gisakyan sa biktima tungod kay bullet proof kini.

Ang gunman sa maong pagpamanhig nga si Orlando Sagnoy, 30, taga barangay Mactan, dakbayan sa Lapu-Lapu ug ang drayber sa motorsiklo nga si Roberto Terciro, 27, taga Mohon, dakbayan sa Toledo ug ang giingong mastermind sa krimen nga si Jerome Noel, taga barangay Banawa, Guadalupe ug usa ka contractor, nasikop sa mga polis.

Kahinumduman usab nga si Sagnoy mitug-an ngadto sa mga polis nga gisab-it niya diha sa punoan sa Acacia sa Ayala ang ingram submachine pistol nga dunay silencer nga iyang gigamit sa pagpamanhig.

Si Sagnoy natagboan sa mga polis nga miresponde nga naglakaw sa Ayala compound tungod kay gibiyaan kini ni Terciro. Dugang niini si Sagnoy mitug-an ngadto sa mga polis sa iyang kauban ug mastermind hinungdan sa pagkasikop ni Noel. (BANAT NEWS)