Mipatay sa tanod gipanid-an na

CEBU, Philippines - Ang kapolisan sa Barili aduna nay gipanid-ang tawo nga mipatay sa usa ka tanod didto sa canteen sa Mantayupan Falls, sa barangay Campangga sa maong lungsod niadtong Miyerkules sa kaadlawon.

Si Sr. Insp. Marlon Gumabao sa Barili Police Station mibutyag sa Banat News nga nagpabilin karong gawasnon ang mipatay kang Maximo Ricablanca.

Apan matud ni Gumabao nga nakadawat sila og taho nga ang biktima ug ang tawong gipanid-an nila karon may daang panagbangi.

Hinuon miingon si Gumabao nga naglisod gayud sila pagsubay sa maong krimen tungod kay atol sa maong hitabo walay bisan usa nga nakakita sa kriminal.

Midugang si Gumabao nga wala pa usab nila madawat ang resulta sa otopsiya nga gihimo sa taga Scene of the Crime Operatives (SOCO) diin mao ra gayud kini ang makatumbok sa hinungdan sa kamatayon sa biktima.

Miingon si Gumabao nga ang bugtong gihuptan nila karon mao lang ang mga circumstantial evidence.

Mahinumdoman nga niadtong Miyerkules sa kaadlawon samtang nag-duty ang biktima sa maong lugar nakig-inom kini uban sa iyang kauban nga si Agapito Pantalean.

Apan pipila ka oras mibiya si Pantalean kay aduna kini gilakaw ug sa iyang pagbalik mao nalay iyang nakita nga nagkuob na sa yuta ang biktima nga wala nay kinabuhi ug may samad pinusilan sa likod nga bahin sa ulo.   (BANATNEWS)