40-anyos nga ginang sikop sa drug-bust

CEBU, Philippines - Usa ka 40-anyos nga babaye kinsa gipasanginlang pusher og shabu ang nasikop sa kapolisan sa dakbayan sa Talisay kagahapon sayo sa buntag diha sa sitio Tunga, barangay Tanke sa nahisgutang siyudad.

Ang suspetsado mao si Marites Gasalatan Cuico, residente sa nahisgutang dapit.

Si Inspector Hugo Rio Ipong uban ni PO3 Rey Bucao, PO3 Benedicto Lasque, PO2 Roy Lofranco ug PO1 Euwen Pitogo armado sa search warrant nga giluwatan ni Judge Soliver Peras sa Regional Trial Court, Branch 10 paglusad sa maong ronda.

Si Ipong nga nahinabi sa Banat News kagahapon nagkanayon nga sulod sa duha ka semana nilang gipanid-an si Cuico human sila makadawat og report kabahin sa ilegal niining kalihukan.

Matud ni Ipong nga naglisod sila sa pagdakop kang Cuico tungod kay magbalhin-balhin kini og balay.

Nasakmit gikan sa balay niini ang usa ka dakong plastik nga pakete diin gisulod ang laing dakung pakete, duha ka medium nga pakete nga pulos may sulod nga gidudahang shabu, usa ka medium nga pakete nga gisudlan og 21 ka gagmay’ng paketeng may sulod gihapong gidudahang shabu, laing medium nga pakete usab nga may gisulod nga laing 20 ka gagmay’ng pakete nga dunay sulod gihapong gidudahang shabu, usa ka purse, ug duha ka gunting.

Si Cuico kinsa nagtingkagol karon sa Talisay City detention cell ang mag-atubang sa kasong kalapasan sa Akta Republika 9165 kon “Comprehensive Dangerous Drugs Act”.

Sa laing bahin, si Kapitan Jonathan Tumulak sa barangay Lawaan I, uban sa iyang mga konsehal ug tanod mitugyan ngadto sa kapolisan diha saTCPS og mga drug paraphernalia.

Si Tumulak nga nahinabi sa Banat News kagahapon nagkanayon nga ang maong mga drug paraphernalia na-recover nila diha sa mga abandonadong mga balay sa Phase 2 Block 5, Lot 16, Block 9, Lot 68, Block 17, Lot 68, Block 17, Lot 2, Camella Homes diha sa ilang barangay atol sa gipahigayong roving sa mga tanod. (BANATNEWS)