CEBU, Philippines - Duha ka mga bagitong polis nga nadestino sa Centralized Beat Patrol sa Cebu City Police Office ang paesplikahon human masutang wala sila sa ilang pwesto.
Ang paesplikahon sulod sa 24-oras mao sila si PO1 Erman Yap ug Camilo Ojeda kinsa nadestino sa eskina sa F. Cabahug ug J. Luna Avenue human sila wala makit-i sa ilang opisyal nga si Insp. Mercy Villaro.
Sumala pa nga ang duha wala diha sa ilang pwesto alas-9 sa buntag niadtong Biyernes nga unta gipaabot nga nagbantay sila sa maong dapit nianang mga orasa.
Gikatahong nagpangutana ni Villaro ang mga vendors sa palibot diin sagad mopwesto ang maong mga polis apan walay bisan usa kanila ang nakahibalo kun diin ang duha.
Samtang si PO3 Ricardo Mejia nga mipahigayon og inspeksyon sa dalan Imus sa barangay Day-as sa iyahang report giingong nakamatikod usab nga walay polis sa maong lugar.
Si Sr. Supt. Melvin Ramon Buenafe sa sayo pa mipahibalong pahingusgan niini ang police visibility sa dakbayan aron kapugngan ang mga mahitabong krimen ug makaresponde dayon sa mga alarma. (BANATNEWS)