'Kublan' na agtang nabuhi

CEBU, Philippines - Usa ka lalaking giingong ‘kublan’ ang nakalingkawas gikan sa kamatayon bisan paman natusak kini sa bala apil na sa iyang agtang ug nakagawas dayon sa tambalanan ug maoy nangunay sa pag-report sa nahitabo kaniya diha sa kapolisan.

Ang pagpamusil nahitabo diha sa balay sa biktimang si Joselito Facion, 45, nga molupyo sa sitio Sto. Tomas sa barangay Poblacion sa siyudad sa Danao kagahapon sa kaadlawon nga diin ang suspek mao ang iyang silingan nga si Rommy Amoroto.

Mismong si SPO4 Jose Salingua Jr., dihang nahinabi sa Banat News nahibulong sa talagsaong hitabo.

Sumala pang Salingua base sa imbestigasyon, nag-uban ang biktima ug pamilya niini nga nangatulog dihang nakadungog ang biktima sa mga buto-buto sa armas gikan sa gawas nga bahin sa ilang pinuy-anan.

Tungod niini daling migawas ang biktima aron mosusi apan sa pag-abli niini sa pultahan nasawod niini ang bala dihang kalit kining gipusil sa suspek makadaghang higayon.

Ang biktima naigo sa agtang, dughan ingon man sa bukton ug nalup-og hinungdan nga dali kining gihatud sa mga kabanay ug silingan sa Danao District Hospital.

Matud ni Salingua nga daku nalang ang ilang katingala nga nakagawas dayun ang biktima sa maong tambalanan ug dakung buhi bisan pa sa mga samad pinusilan nga naangkon nga wala dutli. Gidudahan nila nga dunay ‘anting-anting’ ang biktima.

Apan atol sa pagsukit sukit sa kapulisan sa asawa sa biktima mitug-an kini nga kalibre .22 nga armas lang ang gigamit sa suspek ug swerte usab nga pulos tapsing sa agtang ug dughan ang mga samad pinusilan nga naangkon sa biktima.

Ang kapulisan padayun pa sa ilang hot pursuit operation pagsikop sa suspek nga silingan ra sa biktima aron pagtino sa motibo sa krimen.

Sa laing pagpamusil, patay ang usa ka 18-anyos nga drayber sa traysikad ug laing duha ang kritikal ang kahimtang sa duha ka pagpamusil sa laing barangay sa maong dakbayan niadtong adlaw’ng Biyernes.

Dead on arrival sa Danao District Hospital si Raymund Jasmen, giingong 15-anyos apan 18-anyos ang naa sa blotter sa kapulisan nga molupyo sa sitio Villasocorro sa barangay Suba.

Tulo ka mga minor de edad ang gitumbok nga suspek nga pulos gibana-banang nagpanuigon og 16-anyos nga gitago lang ang mga pangalan.

Matud pa ni Salingua nagduwa og basketball uban sa mga barkada ang biktima dihang ang tulo ka mga mamumuno nga ‘badoy’ ang mga sapot ang nahiagi sa lugar aron moduaw sa lubong sa ilang namatay nga barkada diha sa sementeryo.

Apan pag-agi sa mga batan-on gibugal-bugalan kini sa biktima tungod sa badoy nga gisuot ug adis adis nga pamuhok hinungdan sa kasuko sa grupo ug paglabay sa pipila ka gutlo namalik kini nga nagdala na og armas dayun giduol sa tulo ang biktima ug gipusil kini makadaghang higayon.

Ang biktima nga naigo sa dughan, liog ug walang bahin sa tiil gihatud sa Danao District Hospital apan gideklarar nga patay na, samtang ang mga mamumuno daling nangikyas.

Samtang sa laing pagpamusil, diha sa sitio Ylaya sa barangay Guinacot pulos kritikal ang kahimtang sa duha ka biktimang 17 ug 13-anyos human gipusil sa wala pa matumbok nga lalaki.

Ang 17-anyos nga taga Cogon Guinsay, Danao naigo sa ulo samtang ang 13-anyos naigo sa liog ug daling gidala sa Danao District Hospital apan gibalhin sa tambalanan dinhi sa dakbayan sa Sugbo. Gikareport nga usa sa mga biktima ang namatay usab apan wala pa makumpirmar sa kapolisan.   (BANATNEWS)