Kap gi-ombudsman

CEBU, Philippines - Gipasakaan og kaso sa Ombudsman-Visayas ang kapitan ug laing duha ka opisyal sa barangay Bunakan, lungsod sa Madridejos isla sa Bantayan nga gipasanginlang mi-abuso sa gahum.

Ang gireklao mao si Kapitan Benito Mansueto ug ang tresurera nga si Porferia Ducay ug kalihim nga si Melyn Batiancila.

Midangop sa Ombudsman ang residente sa barangay Bunakan nga si Salvacion Villacarlos tungod sa paglukat niya og barangay clearance niadtong Sityembre 22.

Nakuha na unta ni Villacarlos ang barangay clearance apan gibawi kini ni Kapitan Mansueto ug sa dihang iyang gipanguta kun unsay hinungdan nganong gibawi kini, igo lang siyang giingnan nga unya na siya palukaton og balik sa clearance human sa eleksiyon sa barangay ug SK sa Oktubre 25.

Gihulagway ni Villacarlos nga personalan ug dunay bulok politika ang gihimo sa kapitan kaniya, nga gihulagway niyang aduna siyay pagdumot kaniya sanglit siya man ang mikontra niini sa pagka-kapitan niadtong tuig 2007 apan napilde siya niadtong higayona.

Gipangayo usab sa reklamante ngadto sa Ombudsman nga ikapatuman ang preventive suspension samtang magpadayon ang pagdungog sa iyang giduso nga reklamo.

Ang kapitan gitakdang magpasubli og balik sa nagsingabot nga eleksyon samtang wala pa usab matino ning tigbalita kun magpapili ba og balik atbang sa kampo sa kapitan si Villacarlos. (BANATNEWS)