Buli natumba sa balay

CEBU, Philippines - Gidali paghatod ngadto sa Visayas Community Hospital ang tulo ka tawo nga naangol human natumbahan ang ilang balay sa usa ka buli nga may gitas-ong 36 ka tiil niadtong miaging adlaw sa sitio Sampaguita, barangay Tejero ning syudad. Ang magtiayong Solomon ug Nenita delos Santos ug usa ka Arnel Abad nakaangkon og pangos ug bun-og sa ilang lawas ug nawong human nalakip ang ilang mga balay sa unom ka balay nga natumbahan sa buli.

Si Kagawad Gary Lao sa Tejero kinsa usa usab sa mga residente sa maong dapit nagkanayon nga nahitabo ang pagkahagsa sa maong buli atol sa kusog kaayong ulan alas-11 niadtong Huwebes sa gabii.

Apan si Lao miklaro nga dili lang ang kusog nga uwan ug hangin ang hinungdan sa pagkatumba sa buli tungod kay dugay nang gireklamo sa mga lumolupyo sa maong dapit nga nagtakilid na ang buli.

Matud pa ni Lao nga dugay na siyang mipadala og suwat ngadto ni Cebu City Disaster director Alvin Abad aron maputol ang maong buli apan dugay kining naaksiyonan tungod sa kadaghan sa sulat gikan sa nagkadaiyang barangay sa siyudad nga magpaputol usab og buli. Agi’g tabang, si Lao misaad nga dalion ang resolusyon sa barangay aron mahatagan og financial assistance ang mga biktima.

Mangayo usab sila og dugang tabang gikan sa kagamhanan sa siyudad sa Sugbo alang sa pagpaayo sa mga nagubang balay. (BANATNEWS)