Bombay gitulis sa Carcar

CEBU, Philippines - Usa ka tigpatantong “Bombay” ang nabiktima sa pagpanulis diha sa sitio Campo, sa barangay Guadalupe sa lungsod sa Carcar niadtong Huwebes sa udto.

Ang gitulis mao si Jaskaran Singh, 23, temporaryong nagpuyo sa Dumanjug ug tigpautang sa habagatang bahin sa Sugbo.

Matud pa sa report sa kapolisan sa Carcar, kasamtangang naningil sa mga nangutang kaniya si Singh sa maong dapit sa dihang kalit kining giduol sa duha ka wala mailhing lalaking pulos nagtaptap sa ilang nawong ug mition kaniya’g armas.

Nakuha ang kinolektang P2 mil ug cellphone. Human niini misakay sa usa ka Honda 200 XR ang duha dayong ikyas paingon sa barangay Poblacion.

Ang kapolisan sa Carcar padayon pa’ng nag-imbestigar sa hitabo. (BANATNEWS)