'Kolektor' og P5 sa terminal dili tinuod - Sepulveda

CEBU, Philippines - Kusganong gihimakak ni Capitol consultant on information Rory Jon Sepulveda ang pasangil ni Bise Gob. Gregorio Sanchez kalabot sa giingong pagpangolekta og P5 nga entrance fee sa Cebu South Bus Terminal sa mga empleyado sa manpower agency nga gidumala sa pamilya ni Glenn Soco.

Gipasabot ni Sepulveda nga ang turning machine maoy modawat sa P5 nga coin sa pasahero, samtang kawani sa manpower agency mohatag og resibo.

Si Sepulveda miingon nga ang makahilabot lamang sa kuwarta mao ang cash collector sa terminal nga si Karen Quijano.

Gihulagway ni Sepulveda ang maong pasangil sa bise gobernador nga usa ka matang sa pagtipas sa isyu sa gihimong imbestigasyon sa Committee on Discipline and Investigation (CODI) kalabot sa pagkadasmag sa sakyanan sa Kapitolyo sa usa ka bata niadtong gabii sa Agosto 29, 2010 nga usa ka Domingo.  - BANAT NEWS