Gipusil tungod sa lalis sa trapiko

CEBU, Philippines - Usa ka wala mailhing drayber sa traysikol namusil ngadto sa 50-anyos nga drayber sa tangkal-tangkal tungod sa bangi sa trapiko niadtong Miyerkules sa hapon sa sitio Nonoc, barangay Tabunok, dakbayan sa Talisay.

Si Elizer Navaja, taga sitio Ilang-ilang, Lagtang, Talisay, drayber sa tangkal-tangkal (MK-8540) nakaangkon og samad pinusilan sa tuong abaga ug daling gidala sa Talisay City District Hospital human gipusil sa drayber sa traysikol.

Si PO1 Rosauro Pasumala nga nahinabi sa Banat News kagahapon mibutyag nga ang traysikol nag-una sa tangkal-tangkal nga medyo kusog ang dagan apan pag-abot sa eskina kalit lang mipreno.

Si Navaja nasuko tungod kay hapit madusmo ngadto sa traysikol ang tangkal-tangkal tungod sa kabug-at sa karga.

Nahitabo ang lalis. Matud ni Pasumal nga nagtuo si Navaja nga makigsinukmagay ngadto kaniya ang drayber sa traysikol apan mihulbot kini og armas ug dayong pusil ngadto kaniya. - BANAT NEWS