Tigulang 'palgang may hikot sa liog

CEBU, Philippines - Usa ka tigulang babaye nga giingong nakasinati og nervous breakdown napalgang patay sulod sa payag nga gituohang naghikog sa miaging gabii sa bukirang bahin sa sitio Tabla, barangay Sudlon I, ning siyudad.

Si Antonia Villegas, 66, dalagang-ulay, napalgang patay sa iyang pag-umangkong si Jupel, 16, nga nagluhod sulod sa iyang payag nga gihigtan ang liog gamit ang bakus sa sinina diin ang pikas tumoy niini gihigot ngadto sa kahoy sa atop sa payag. Si Villegas lumad nga taga Tabura, barangay Pardo ning dakbayan ug gikatahong managmal na sa iyang mga paryente sa Tabura human nakasinati og nervous breakdown hinungdan nga gilahi kini ug nakadesisyon ang mga kabanay nga adto ibutang sa sitio Tabla.

Gipayagan sa iyang mga kabanay si Villegas unya hatdan lang og kaon sa iyang mga pag-umangkon.

Si Villegas napalgang nagbitay sulod sa payag ug wala nay kinabuhi sa dihang gihatdan unta og pagkaon ni Jupel apan na-report sa kapolisan nianang alas 10 na sa gabii.

Ang mga sakop sa Homicide Section miadto sa lugar ug ilang nasuta nga walay foul play ang kamatayon ni Villegas apan ipailawom sa awtopsiya ang patay’ng lawas pagsigurong wala kini gipatay og laing tawo.   – BANAT NEWS