Motor vs patrol car, 1 patay

CEBU, Philippines - Patay ang usa ka lalaki human nabangga ang gisakyang motorsiklo ngadto sa usa ka patrol car alas 7 sa miaging gabii sa sitio Dasuga Dos, barangay Lutopan, siyudad sa Toledo.

Ang namatay nailhan nga si Yujimbo Abueva, 38, molupyo sa maong lugar.

Sa pakighinabi sa Banat News sa Toledo Police Station nga si Chief Insp. Jovito Canlapan mibutyag kini nga ang blue patrol car sa Lutopan Police Station nga gimaneho ni Rogelio Damasole, trabahante sa Toledo City Hall gikan sa ilang police station alang sa usa ka Napolcom inspection.

Samtang pabalik ang patrol car sa ilang buhatan, wala makabantay samtang nagtangas nga adunay nagdulhog nga Honda XRM (IJ-1539).

Nabantayan sa drayber sa patrol car nga kusog ang dagan sa motor. Nakita si Abueva nga milupad paingon sa sementadong dalan sa maong lugar.

Tungod niini, daling gidala sa Cebu City Community Hospital ang biktima sakay sa patrol car sa pagtuo nga masalbar pa, apan pag-abot gideklarar kining dead on arrival.

Matud pa ni Canlapan nga kasamtangan pa nilang gikustodiya ang drayber sa patrol car samtang nagpaabot sa desisyon sa pamilya ni Abueva.

Nasayran ni Canlapan gikan sa amahan sa namatay nga wala kini lisensiya nga nagmaneho sa motor, apan nagkanayon kini nga nagkinahanglan lang siya og tabang alang sa pagpalubong sa iyang anak. – BANAT NEWS