4 tulisan gipasalbahan

CEBU, Philippines - Upat ka tulisan wala manumbaling bisan gipasalbahan sa polis nga migukod kanila niadtong Martes sa hapon sa tulay sa Mananga, barangay Tabunok, dakbayan sa Talisay.

Si PO1 Jundave David nga nahinabi sa Banat News nagkanayon nga uban nila ni PO2 Henry Mata ug PO1 Rusty Pelayo gigukod nila ang mga tulisan nga nanulis sa mga pasahero sa PUJ apan kusog kaayo kining nanagan hinungdan nga nagpasalba siya aron mohunong apan wala gyud kini manumbaling ug misuot-suot sa kabalayan sa sitio Mananga ug wala gyud nila masakpi.

Duha sa ilang gigukod nailhan sa mga polis nga sila si Perry John “Ajing” Rasagara, 22, taga dalan Colis, Tabunok ug Johnfrits Abellanosa.

Usa sa mga biktima nga si Maria Janen Adlawan, 16, taga barangay Linao, Talisay mi-report sa mga polis human tulisa ang PUJ nga gisakyanan.

Base sa imbestigasyon nga pasado ala una sa hapon nagsakay siya og PUJ gikan sa dakbayan sa Sugbo paingon na mopauli.

Diha dapit sa usa ka dakong tindahan sa Tabunok ang upat ka tulisan misakay sa PUJ ug pag-abot sa lugar mihulbot sa ilang mga dalang kutsilyo ug mideklarar nga hold-up.

Si Adlawan mipasangil nga si Rosaraga milingkod tapad kaniya ug gition ngadto sa iyang tiyan ang kutsilyo nga gibitbit niini ug dayon bira sa iyang shoulder bag nga adunay Samsung cellphone kantidad og P2,000.  – BANAT NEWS