7-anyos dasmagan sa motor

CEBU, Philippines - Nabulit sa   mga samad ug bun-og ang lawas sa usa ka 7 anyos nga batang babaye human kini dasmagi sa motorsiklo didto sa barangay Poblacion, lungsod sa Tuburan, sa miaging buntag.

Ang biktima nailhang si Trishia Mariel Malinao, 7, nga taga Tuburan ug nagtungha sa Grade 1.

Samtang ang drayber sa motorsiklong nakadasmag kaniya nailhan usab nga si Alberto Taneo Sarlatan, 24, nga taga barangay Bagasawe sa maong lungsod.

Sumala sa kapolisan nga nagbaguros pagpadagan sa iyang motorsiklo ang suspetsado dihang kalit nga milabang sa karsada ang biktima paingon sa iyang eskuylahan.

Nalagpot ug misaliring sa karsada ang biktima nga maoy hinungdan sa nahiagoman niining mga samad ug bun-og sa kalawasan. 

Ang biktima gihatod dayon ngadto sa Tuburan District Hospital samtang ang suspetsado nagtingkagol sa prisohan sa lungsod. – BANAT NEWS