No. 2 pusher nasikop

CEBU, Philippines - Duha ka mga drug pusher, usa niini anaa sa ikaduhang listahan sa mga otoridad, nadakpan sa managlahing lugar sa buy bust operation nga gihimo sa mga ahente sa Philippine Drug Enforcement Agency (PDEA)-7 sa miaging adlaw.

Usa sa dinakpan   mao si Doria Tabalin alias Pia, 40, minyo, nga taga barangay Mambaling ning dakbayan sa Sugbo kinsa nahimutang sa ikaduhang listahan sa PDEA-7 sa tibuok Central Visayas .

Gawas kang Tabalin, nasikop usab sa taga PDEA 7 si Mark Jusen Alvaro, 22, ulitawo, nga taga Looc sa dakbayan sa Danao.

Si Tabanao mibutyag nga nadakpan si Pia   dihang usa ka PDEA agent nga wala magpaila maoy mipalit og usa ka medium pack sa shabu ug mibayad kini og P1000, nga   minarkahang salapi.

Human itunol ni Pia ang shabu, gisikop dayon siya sa laing PDEA agent, kinsa nakasakmit pa og laing medium size nga gituohang shabu gikan gihapon kaniya human siya rekisaha.

Matud ni Tabanao nga si Pia maoy No. 2 sa ilang target list dinhi sa tibuok Central Visayas sanglit dugay na kaayo kining namaligya og shabu dinhi sa dakbayan ug sa kalungsoran sa lalawigan. Gani matud pa niya nga ang bana ni Pia nadakpan na usab kaniadto apan inig gawas sa bilanggoan mobalik gihapon sa illegal nga kalihokan.

Si Tabanao mibutyag nga ang area ni Pia sa pagpamaligya og shabu mao ang Mambaling, dakbayan sa Toledo, mga lungsod sa Balamban ug Pinamungahan diin mohalin kini og kaping 200 gramos matag semana.

Samtang si Alvaro kinsa nahilista isip level 3 nga drug pusher, nakuhaan usab og usa ka dako-dakong putos sa shabu ug laing walo ka gagmay nga pakete, dala na niini ang usa ka pakete nga ilang gibayran sa mga ahente sa PDEA og P200 nga minarkahang salapi, uban sa usa ka .22 kalibreng revolver nga adunay upat ka buhing bala nga giluklok sa hawak niini.

Matud ni Tabanao nga human nila madakpi si Pia, gisunod usab nila pagsikop si Alvaro, kinsa giila nga may amo nga maoy tig-supply kanila og shabu aron ilang ipamaligya.

Si Pia ug Alvaro pulos mag-atubang sa kaso nga paglapas sa dangerous drugs law.

Laing kaso nga atubangon ni Alvaro mao ang kalapasan sa Comelec gun ban.  – BANAT NEWS