Misukol sa 2 tulisan

CEBU, Philippines - Naglumba sa pagpanagan ang duha ka tulisan sa dihang ang drayber sa taxi nga ilang gitulis wala maigo sa ilang pagpusil ug nakahigayon sa pagpakiglayog kanila sulod sa sakyanan hangtod nabangga kini sa poste sa suga sa A.C. Cortes Avenue, barangay Cambaro, dakbayan sa Mandaue.

Ang drayber sa K-Factor Taxi nga si Rosito Villegas, 33, minyo nga taga barangay Basak, dakbayan sa Mandaue nakahupo sa dihang gipusil. Ang windshield sa taxi maoy naigo ug nabuslot.

Si PO1 Rery Patigdas sa Opao Police Station nga nahinabi sa Banat News miingon nga ala 1 pasado ang takna sa kaadlawon nga giluwanan sa duha ka wala mailhing lalaki ang biktima gikan sa sitio Acasia sa barangay Pusok, dakbayan sa Lapulapu.

Nagpahatod ang duha ka pasahero sa dakbayan sa Mandaue apan sa ilang paghidangat sa maong dapit gitionan siya og rebolber sa usa ug mideklarar og tulis.

Nagdumili si Villegas sa paghatag sa iyang kinitaan hinungdan nga gipusil siya makausa ka higayon apan wala siya maigo ug dali usab nga gilayog sa biktima ang mga tulisan.

Sa maong linayogay, ang taxi nga nagsigsag na ang dagan nabangga sa poste nga nakaparatol sa mga tulisan nga maoy hinungdan nga nanagan pahilayo.

Gitabangan sa paggukod ang duha ka tulisan sa mga taxi driver nga nag-estambay sa maong lugar apan wala na madakpi sa dihang misuot sa kabalayan sa sudlonon nga bahin sa maong lugar ug nangatras usab sila sa dihang gipabuthan sa armas. (BANATNEWS)