Van nasangit sa flyover

CEBU, Philippines - Usa ka van nga giguyod sa prime mover nasangit sa flyover didto sa eskina sa mga dalan A.C. Cortes ug M.L. Quezon, sa barangay Maguikay, dakbayan sa Mandaue nga maoy nakapabara sa trapiko kagahapon sa alas 9:00 sa buntag.

Si Domingo Cortes nga maoy media liaison officer sa Traffic Enforcement Agency of Mandaue (TEAM) nga nahinabi sa Banat News miingon nga paingon sa pantalan sa dakbayan sa Sugbo ang maong van nga giguyod sa prime mover nga gimaneho ni Jenifer Cornelio, hingkod, nga taga San Fernando , Cebu nga misubay sa dalan M.C, Briones dayong liko ug suong sa flyover padulong sa dalan A.C. Cortes Avenue paingon sa reclamation area.

Apan matud pa ni Cortes nga misipyat ang pagbanabana sa drayber sa gihabogon sa giguyod niyang 10-footer van, hinungdan nga nasangit kini sa flyover.

Milanat og pipila ka takna una maugkat ang maong van hinungdan nga walay mga sakyanang nakalusot sa maong lugar.

Si PO1 Rolando Gilego sa traffic section sa kapolisan sa maong dakbayan nga nahinabi sa Banat News mibutyag nga gisusi nila uban sa mga engineer sa Department of Public Works and Highways (DPWH) 7 ang flyover ug nasuta nga wala kini madaot.  (BANATNEWS)