Sikyu di paguwardiyaho'g politiko

CEBU, Philippines - Dili lamang mga polis ang gidid-an sa kagamhanan sa pag-apil-apil sa politikanhong kalihokan sa umaabot nga eleksyon sa barangay kundili lakip usab nga gihigpitan ang mga pribadong security guard.

Mao kini gitataw ni Acting Regional Director Veronico Petalcorin sa Commission on Elections (COMELEC)7 kinsa nagkanayon nga   iya nang gipakigsultihan ang tanang mga nagpadagan og security agency kalabot sa maong reglamento.

Matud pa ni Petalcorin nga karong Oktubre 25, 2010, ipatuman na ang piniliay sa barangay ug Sangguniang Kabataan (SK) ug higpit nga gidid-an ang mga security guard sa pagkuyogkuyog sa mga kandidato sa barangay.

Miingon siya nga kun unsay gidili ngadto sa kapolisan, mao usab ang balaod nga ipatuman ngadto sa mga guwardiya nga gipabantay sa mga nagkalain-laing pribadong establisamento.

Matud pa ni Petalcorin nga kinahanglang dili magpagamit ni kinsa mang politiko ang mga security guard ilabi na kun agnihon sila aron mahimong bata-bata sa usa ka kandidato. Miingon siya nga ang katungdanan sa usa ka guwardiya mao ra ang pagbantay sa establisamentong iyang giguwardiyahan ug dili kay magkuyog-kuyog og kandidato.

Ang usa ka guwardiya nga masakpang magkuyog-kuyog sa pangampanya o kaha maoy mopapilit og mga campaign material pabor sa usa ka kandidato, mahimong dakpon sila kay wala sila’y pagtugot sa ilang agency, gawas lamang niadtong may otorisasyon sa ilang ahensya.

Gipasabpot ni Petalcorin nga ang mga otorisadong guwardya mao kadtong gitawag nga protected guard kinsa gipaubos unang daan sa usa ka higpit nga pagbansay bahin sa mga paagi sa pag-escort og politiko.

Gipahibawo usab ni Petalcorin ang tanang mga polis ug mga security guard   nga gihimong escort sa mga politiko ubos sa Comelec resolution 9027.

Matud niya nga kadtong mga mayor o kaha mga pribadong tawo nga gitangtangan og escort unya gustong mo-apply og balik mahimo na silang maka-apply  pag-usab ngadto sa buhatan sa Comelec sa probinsya unya kinahanglang mobayad sila og P1,000. (BANATNEWS)