Rama mopasusi sa mga fire extinguisher

CEBU, Philippines - Si Cebu City Mayor Mike Rama mitumbok nga ipasusi usab niya ang napalit sa kagamhanan sa siyudad sa Sugbo nga mga fire extinguisher para sa city hall. Kini aron mahibaw-an sa iyang buhatan kun magamit pa ba kini sa panahong adunay sunog sulod sa city hall. Gipasabot sa mayor nga ang katuyoan sa maong pagsusi dili tungod sa   kwestyonabling pagpamalit og mga fire extinguisher sa mga opisyal sa barangay Guadalupe nga giingong may dakong anomaliya. 

Si Rama nagkanayon nga iya na karong gitahasan si City consultant ug kanhi konsehal Gerry Carillo nga maoy mosusi sa maong mga fire extinguisher.

Sigon pa ni Rama nga buot niyang masayran kun dili ba depektoso ang mga fire extinguisher sa city hall. Sayo niini mimando si Cebu City South District Congressman Tomas Osmeña nga ipaimbestigar ang P11 milyones nga gahin sa pagpamalit og 3 mil ka mga fire extinguisher sa barangay Guadalupe. Apan si Kapitan Eugenio Faelnar mihimakak sa maong pasangil ug mipadayag nga andam siyang moatubang bisan unsang imbestigasyon. (BANATNEWS)