Motor natagak 1 patay, 1 angol

CEBU, Philippines - Namatay ang amahan samtang anaa sa talandugong kahimtang ang iyang anak human matagak ang ilang gisakyang motorsiklo sa usa ka bung-aw didto sa sitio Cabadiangan, barangay Lunop, lungsod sa Boljoon sa miaging hapon.

Ang namatay nailhan nga si Mauricio Fegarido Sr., 54, samtang ang anak niini nga anaa sa kritikal nga kahimtang mao usab si Mauricio Fegarido Jr, 32, nga pulos taga sitio Camp Franco, barangay Lower Beserrel sa maong lungsod, ug pulos mag-uuma.

Sa pakighinabi sa Banat News ni PO1 Michael Anciano, nasayran nga si Fegarido Jr. maoy nagmaneho sa usa ka Suzuki Krystal 110 nga adunay plakang GX-9583, ug angkas ang iyang amahan kay mopauli na.

Sa diha nga naabot na sila sa kurbadahong karsada sa maong lugar wala na mapiog sa drayber ang dagan sa motor hinungdan nga mideretso sila ngadto sa bung-aw nga gibana-banang may gilawmong 15 ka tiil.

Pagtugpa nila sa ubos diin didto ang dagko kaayong bato, nangabalibali, nangasamad ug nangabun-og ang ilang kalawasan ug ang amahan maoy nagrabihan.

Ang amahan didto ihatod sa Oslob District Hospital diin gideklarar kini nga dead on arrival, samtang ang anak didto dad-a sa usa sa mga tambalanan sa dakbayan sa Sugbo.

Si Anciano midugang nga nasayran niya nga ang amahan ug anak gikang namiyesta sa maong lugar, unya mao ra og nakainom kuno ang duha nga maoy posibleng usa sa gidudahang hinungdan sa aksidente. (BANATNEWS)