Nagkuha sa igsuon gipusil

CEBU, Philippines - Gibati og kahadlok ang mga magtutudlo ug ubang mga tinun-an sa Lipata National High School sa lungsod sa Minglanilla sa dihang usa ka lalaki nga nagkuha sa iyang manghod nga tinun-an sa maong tunghaan gipusil sa milabay’ng adlaw.

Ang napusilan mao si Kevin Barte, 19, ulitawo, residente sa sitio Upper Pinggan, barangay Pakigne sa nahisgutang lungsod.

Ang suspetsado kinsa nasikop sa gipahigayong follow-up operation sa mga polis mao si Mark Francis Tejano, 20, taga Velpal Subdivision, barangay Pakigne.

Si PO1 Mark Rosaroso sa pakighinabi niini sa Banat News kagahapon mibutyag nga ang manghod nga lalaki ni Barte nga estudyante sa maong tunghaan mipadala og mensahe sa text nga naghangyo ngadto kaniya nga magpakuha tungod kay dunay mga miatang niini diha sa gawas sa tunghaan. Si Barte uban sa iyang inahan nga si Miguela ug uyab nga si Lyn Orirero nagkuyog pag-adto sa tunghaan.

Si Tejano kinsa uban sa wala mailhing mga lalaki miduol ngadto kang Barte sa dihang nakita nila kini diha sa gawas sa tunghaan.

Matud ni PO1 Rosaroso nga kulatahon unta ni Tejano ug sa mga kauban niini si Barte apan nakadagan kini ug nahitabo ang ginukdanay.

Atol sa ginukdanay, gipusil ni Tejano si Barte apan suwerte kay wala maigo ang biktima.

Ang mga magtutudlo ug ubang estudyante nakugang sa pagkabati sa boto-boto.

Human sa insidente si Tejano ug mga kauban niini daling mibiya sa lugar nga nahitaboan apan si Tejano nasikop sa mga polis Velpal samtang nakigtapok sa iyang mga barkada. Si PO1 Rosaroso midugang nga natahap sila nga dunay kalambigitan sa gang war ang maong hitabo.

Si Tejano gikatakdang pasakaan og tukmang kaso karong adlawa tungod sa iyang nabuhat. (BANATNEWS)