Kamatayong Larawan way foul play

CEBU, Philippines –  Ang kamatayon ni Talisay City Veterinarian Galileo Larawan walay foul play base sa resulta sa autopsy.

Ang bayaw sa city veterinarian nga si Eve Larawan nga nahinabi sa Banat News kagahapon sa buntag nagkanayon nga base sa resulta sa autopsy sa lawas sa iyang bayaw nasuta sa Philippine National Police (PNP) medico legal nga si Nestor Sator ug Joe Martin Fuentes nga atake sa kasing-kasing ang namatyan ni Doktor Larawan.

Matud ni Eve nga gipasabot ngadto kanila ni Sator nga normal nga mag-bleeding ang usa ka biktima sa atake ug makabaton usab kini og blood clot sa bisan asang parti sa lawas.

Gibutyag ni Eve nga si Doktor Larawan naghambin og hypertension nga balatian ug gani usahay mosaka ngadto sa 220/160 ang blood pressure niini.

Nasuta usab sa autopsy nga si Doktor Larawan namatay niadtong Martes sa alas 10:00 sa gabii pa, ug gituohan nga gihilantan pa kini sa wala pa mamatay tungod kay nangapaksot na ang panit apan napreserba lang kini sa aircondition sa iyang kwarto nga wala mapawong hinungdan nga wala mo kuyanap ang baho sa iyang patay’ng lawas sulod sa balay.

Wala na siyay sapot nga naghigda sa iyang kama ug adunay migawas nga dugo sa iyang ilong ug may mga lagom sa tuong bahin sa iyang lawas. (BANAT NEWS)