Mga balay kahilayan sa dakbayan sa Mandaue higpit nga gi-monitor

CEBU, Philippines –  Higpit nga gi-monitor sa task force sa dakbayan sa Mandaue ang mga balay kahilayan nga nagpasiugda og kinawatkawat nga mga law-ay nga pasundayag nga naglakip na sa hubohubo sa mga kababayen-an.

Si city administrator Briccio Boholst nga nahinabi sa mga tigbalita miingon nga ilang gihimo karon ang mga pamaagi nga sayon ug labing dali nga pagkuha og business permit sa mga negosyante. 

Kini ang hinungdan nga ang tanang patigayon nga tukoron sa dakbayan nga ilang gituohang makahatag og panarbaho ug makahatag og buhis, ilang gihatagan sa mga dokumento nga gikinahanglan alang sa legal nga operasyon.

Gitataw ni Atty. Boholst nga higpit nga gidili sa kagamhanan sa maong dakbayan ang pagpasiugda og malaw-ay nga matang sa patigayon nga maglakip sa hubo-hubo sa mga balay kahilayan.

Dugang pa ni Boholst nga dili kalikayan nga adunay mga patigayon nga gihatagan og permit sanglit ang pananghid sa mga tag-iya nga imnanan lang ug mga kan-anan ang ilang patigayon.

Apan matud pa ni Boholst nga sa dihang nagpadayon na ang maong patigayon wala lamang damha nga nagpasiugda kini og malaw-ay nga kalihokan panahon sa gabii.

Si Boholst miingon nga mahimo lamang mapakgang ang maong illegal nga kalihukan sa higayon nga madiskobrehan kini sa task force nga gitahasan sa pag-monitor sa maong mga balay patigayon. (BANAT NEWS)