CEBU, Philippines – Mikapin sa P50 mil ang balor sa mga alahas nga nasakiyo sa duha ka armadong mga lalaki nga mitulis sa usa ka pawnshop nga bag-o pang gibuksan didto sa Duterte St., sa barangay Poblacion siyudad sa Danao niadtong Biyernes sa alas 12:30 sa udto.
Ang gitulis mao ang Cebu Gold Pacific Pawnshop nga bag-o pa lang nagsugod sa iyang operasyon sa maong lugar ug wala pay gidestinong gwardiya.
Si PO3 Brayan Batiquin sa Danao City Police mibutyag sa Banat News nga duha sa tulo ka mga tulisan maoy misulod sa maong prendahanan nga nagpaka-aron ingnong customer, samtang nagsilbing look out ang usa niini sa gawas nga bahin.
Unya dali kaayong nakapahibawo nga tulis, dungan sa pagtion sa ilang mga armas de fuego ngadto sa mga kawani, sa maong prendahanan ug pagkahuman gibunalan og martilyo ang bildo nga gidisplihan sa mga alahas.
Gihulagway sa mga nakasaksi nga gihurot gyud og dala sa mga tulisan ang tanang mga alahas nga mikantidad og kaping P50 mil.
Human masakiyo ang mga alahas, dali kining misakay sa motorsiklo dayung sibat pahilayo.
Ang miresponding mga polis nakapunit og usa ka martilyo nga gigamit sa maong mga tulisan sa pagbuak sa bildo nga gisudlan sa mga alahas. (BANAT NEWS)