Motorsiklo vs jeep pasaheroan 1 namatay
CEBU, Philippines - Patay ang usa ka lalaki human kini mabanggai sa usa ka pasaheroang jeep pasado alas-4 sa miaging hapon sa sitio Sambag barangay Magdugo syudad sa Toledo.
Ang biktima nailhan nga si Rogene Pajanas Prahinog, 23, molupyo sa maong lugar samtang ang suspetsado nailhan usab nga si Ponciano Juaries Cantalijo Jr. molupyo sa Cantabaco sa maong syudad.
Sa pakighinabi sa Banat News kang PO2 Roxam Enerio mibutyag kini nga ang biktima nagsakay sa iyang Honda wave nga motorsiklo nga adunay plakang 3695-GI padulong sa lungsod sa Balamban.
Samtang ang jeep nagbiyahi padulong sa barangay Lutopan sa maong syudad nga nagtangag og plakang GXG-597.
Sa dihang naabot sa kurbadahong bahin sa maong lugar ang biktima mi-overtake sa usa ka sakyanan ug wala makabantay sa kasugat nga jeep pasaheroan hinungdan sa maayong pagkasampak niini.
Ang biktima nalagpot ngadto sa sementadong dalan nga miresulta sa iyang hinanaling kamatayon.
Matud pa ni Enerio nga ang suspetsado boluntaryong mitahan sa iyang kaugalingon human sa maong panghitabo.
Midugang si Enerio nga kasong reckless imprudence resulting to homicide ang posibleng atubangon sa suspetsado kun ugaling mopasaka og kaso ang pamilya sa biktima. (BANAT NEWS)
- Latest
- Trending
