Faelnar papuy-og Africa kun gusto'g suporta kang Tomas

CEBU, Philippines –  Si Cebu City South District Congressman Tomas Osmeña miingon nga mosuporta lang siya sa kandidatura sa anak ni Guadalupe barangay Kapitan Eugenio Jingjing Faelnar nga si Dino Faelnar kun ang amahan niini moadto sa nasud sa Africa ug dili na muuli pa.

Sumala pa ni Osmeña sa interbyu sa DyRF nga dili gyud mausab ang iyang desisyon nga mosuporta sa kontra sa anak ni kapitan Jingjing Faelnar.

Kini tungod kay dili gihapon niya matulon ang gihimong pagbuhi sa mga barangay pinaagi sa pag-corner sa budget sa mga proyekto sa mga barangay ug pagpabor sa usa lamang ka kontraktor nga dugay nang na-blacklisted tungod gihapon sa anomaliya.

"Pero kun molarga si Jingjing paingon sa Africa ug dili mobalik ok ra ko. Pero ang akong gikahadlokan gyud... is to protect the interest and the money that is given to the barangay," sigon pa ni Osmeña.

Gipaningkamotan usab ni Osmeña nga mapaubos sa preventive suspension si Faelnar tungod sa nahimo niini.

Matud pa ni Osmeña nga mahimo siyang mosuporta kang Dino Faelnar kun ang daganan niini mao ang posisyon sa pagkakonsehal ug dili ang pagkabarangay kapitan.

Iyang gitataw nga risgo kaayo nga mahilabtan ra gihapon ang kwarta sa barangay kay maimpluwensyahan gihapon sa amahan ang anak kun mahimo kining kapitan.

"If modagan si Dino pagka councilor Ok ra para nako, but to put him as a barangay captain, it will be putting the money of the barangay at risk because it was already awarded to Quirante," sigon pa ni Osmeña.

Kabahin sa bawos nga pasangil ni Faelnar nga kini maoy mipalit sa depektosong fire extinguisher, si Osmeña nihimakak sa maong pasangil ug miingon nga ang pundo alang sa maong proyekto gitugyan niya sa kapitan apil na ang pagpatuman niini.

Si Faelnar nga nahinabi usab sa DYRF nagdumili na lamang sa pagtubag sa kondisyon ni Osmeña nga paadtuon siya sa Africa ug dili na pabalikon kung gusto niini og suporta para sa iyang anak.

Matud pa ni Faelnar nga sila na lamang ang mogasto sa kandidatura sa iyang anak bisan og makontra niya ang kandidato nga suportahan ni Osmeña. (BANAT NEWS)