Mga tinun-an nag-protesta sa budget-cut sa edukasyon

CEBU, Philippines - Gatusan ka mga tinun-an sa nagkalainlaing unibersidad ug kolehiyo milusad og nationwide protest pagsupak sa pagpagamay sa pundo alang sa edukasyon sa 2011 national budget.

Dinhi sa Sugbo, ang protest rally gipahigayon sa alas 3 sa hapon ug gitambongan sa mga tinun-an sa University of the Philippines, University of San Carlos, Cebu Normal University ug daghan pa.

Si Kyle Tumbiga, chairperson sa League of Filipino Students Cebu sa pakighinabi sa Banat News mibutyag nga sinugdanan lang sa mga umaabot pa nga mga rally ang ilang gihimo kagahapon aron supakon ang pagpuhal sa budget alang sa edukasyon.

Matud ni Tumbiga nga padayon silang makigbisog aron patas-an ang budget alang unta sa edukasyon kay ilang namatikdan nga miubos ang gahin alang sa mga state colleges ug universities sa miaging mga tuig ug misaka usab ang mga tuition fee ug miscellaneous fees sa nagkalain-laing tunghaan.

“We believe that reducing the budget not only to UP but to the whole education sector is a manifestation of further commercialization of education. This would lead to more increases in the tuition and other exorbitant fees in the university,” sumala pa sa pamahayag gikan sa UP-Visayas University Student Council.

Ilang gipanghingusgan ang pagsupak sa P1.39 billion budget cut sa edukasyon kay matud kanila nga ang edukasyon angay lang hatagan sa labing taas nga prayoridad nga maoy nalatid sa 1987 nga Konstitusyon sa nasud.

“Among gi-challenge ang Aquino Administration pag-reverse sa mga policies sa pag-deduct sa budget nga para sa education. Dapat iyang tumanon iyang mga gipangsaad panahon sa iyang kampanya nga iyang e-prioritize the education among others ug mag-allocate og 6% sa GDP based sa gi’recommend sa UNESCO,” sumala pa sa usa ka estudyante sa UP nga mihangyong dili magpaila.  – BANAT NEWS