Sabong sa kaka gidili na sa mga tunghaan

CEBU, Philippines - Tungod sa kadaghan sa reklamo sa mga ginikanan sa mga tinun-an, ang Department of Education (DepEd-7) mipahibalo nga ila na karong gidili ang pagpahigayon og sabong sa kaka sulod ug gawas sa mga tunghaan ilabina sa mga pampublikong tunghaan atol sa adlaw sa tingklase.

Daghan na ang report nga nadawat sa DepEd-7 gikan sa mga ginikanan nga wala na makaagwanta sa pag-apil sa ilang mga anak sa sugal sa kaka.

Si DepEd-7 regional director Recaredo Borgonia miingon nga mipagawas na siya karon og kamanduan nga monitoron ang kabataan nga moapil sa bisan unsang matang sa sugal ilabi na sa sabong sa kaka.

Matud pa ni Borgonia nga iya na usab nga gipahinumduman ang mga prinsipal sa tanang mga pampublikong tunghaan sa Central Visayas nga makig-alayon sa kapolisan ug sa mga tanod pagpahigayon og pagbantay nga walay mahimong sabong sa kaka duol sa tunghaan.

Kini aron dili na matintal ang kabataan pagpusta sa ilang balon sa sugal sa kaka. - BANAT NEWS