Barang ang motibo

CEBU, Philippines - Kamatayon sa ig-agaw maoy gitumbok sa usa ka dinakpan nga nakaaghat kaniya pagpusil-patay sa magtiayong mananambal sa barangay Poblacion, dakbayan sa Lapulapu sa milabay’ng hapon.

Ang nasikop nga si Allan Aca, 31, ulitawo nga taga Kuwaming, Inabangga, Bohol nagkanayon nga ang kamatayon sa iyang ig-agaw nga si Meddy Bacayo tungod sa barang.

Si Aca nadakpan uban ni Bigboy Tabera, 24, taga isla sa Hingutangan, Bohol ug nagpuyo sa Maribago.

Matud ni Aca nga midako ang tiyan ni Bacayo hinungdan nga nagtuo sila nga gibarang kini sa magtiayon.

Gihimakak ni Aca nga hired killer sila ug adunay nagsugo sa pagpatay sa magtiayong Eduardo ug Cresilda Torreon, nanimuyo sa dalan Yakal, Poblacion, dakbayan sa Lapulapu.

Matud pa ni SPO2 Rolito Jumao-as nga personal ang motibo sa pagpatay sa magtiayong Torreon.

Dako og natabang ang taxi driver nga si Efren Cañada sa kasulbaran sa maong kaso. Si Cañada usa sa mga saksi sa kapolisan pagpasaka og kasong double murder batok nilang Aca ug Tabera.

Kahinumduman nga sa milabay’ng hapon, ang magtiayong Torreon didto sa gawas sa ilang balay sa dihang gipusil sa mga suspetsado tumong sa ilang mga ulo ug sa pagdala niini sa Tojong Hospital gideklarar silang patay nang miabot.

Samtang sa gihimong hot pursuit operation sa kapolisan pinangulohan ni Insp. Juan Capacio, hepe sa Crime Against Persons desk ilang nasikop ang duha sa Sitio Agus Diyot, barangay Agus, dakbayan sa Lapulapu mga alas 7:45 sa milabay’ng gabii upat ka oras human sa maong krimen. Uban sa report ni Chester Abadilla (BANAT NEWS)