Tulisan gikiting pagpusil

CEBU, Philippines - Nasabak sa tiil ang usa ka tulisan human kini masabak sa bala sa polis nga migukod kaniya human siya makatulis sa usa ka magsisibya sa usa ka sibyaanan sa radyo didto sa eskina sa Sikatuna ug Sepulveda sa barangay Zapatera ning dakbayan sa Sugbo sa miaging gabii.

Ang nabiktima sa panulis mao si Irene Quileste, 30, nga taga Sikatuna Village, barangay Zapatera, usa ka magsisibya sa DYAR.

Samtang ang suspetsadong mitulis kaniya mao si Gilbert Jumao-as, hingkod, nga taga sitio Riverside, barangay Lorega-San Miguel, ning dakbayan.

Nasikop ang maong suspetsado human siya pusila ni PO2 Clint Almencion sa Cebu City Police Office.

Sumala ni PO2 Almencion nga nag-roving siya niadtong higayona sa maong dapit dihang nakita niya ang suspetsado nga gigukod sa mga lalaki busa misalmot siya sa maong ginukdanay.

Apan matud pa, gipusil siya sa suspetsado ug maayo nalang kay nagamit niya ang iyang kaabtik ug kaigmat, busa wala siya maigo.

Sa kabalaka nga ig-on na gyud siya sa suspetsado, mibalos siya sa pagpabuto ug tungod kay hinarget kaayo siya og kiting, naigo gyud niya sa kiting ang suspetsado.

Gihatod dayon ngadto sa tambalanan ang suspetsado, samtang ang bag ni Quileste nabawi usab sa kapolisan. - BANAT NEWS