CEBU, Philippines - Usa ka wala mailhing lalaki gipusil sa ulo samtang nagsakay og trisikad tungod sa pagbalibad sa dihang gihingian og kwarta sa mga bugoy sa barangay Ermita, dakbayan sa Sugbo.
Anaa sa kritikal nga kahimtang ang biktima nga gihulagway nga anaa sa 40 ang pangedaron, semi-opaw, sakto ang lawas, 5’5” ang gitas-on ug nagsul-ob og puti nga T-shirt ug short pants. Ang mga suspetsado nailhan nga sila Rosewell Pogoy alyas “Tawing” ug Isidro Nudalo alyas “Botiks”, pulos mga molupyo sa sitio Bato, barangay Ermita.
Matud pa usa sa mga arresting officer nga si PO3 Geoffrey Gutual nga walay nakaila sa biktima tungod kay dili kini taga Ermita ug wala pa sila makahinabi niini tungod kay wala pa kini makamata. Base sa pasiunang imbestigasyon nga gipangayoan lamang og kuwarta ang biktima ni Pogoy apan wala niya kini tagda ug misakay hinuon og traysikad hinungdan nga nasuko kaniya ang suspetsado ug gipasundan sa iyang kauban nga si Nudalo. Wala niya mabantayi nga gisundan siya sa ikaduhang suspetsado ug gipusil siya niini gamit ang wala mahibaw-ing kalibre sa armas. Naigo ang luyong bahin sa iyang ulo. - BANAT NEWS