CEBU, Philippines - Sa matag tuig nga pagsaulog sa Press Freedom Week ang kahugpongan sa media nganhi sa Sugbo padayong nagkahiusa ug nagpalig-on sa kawsa sa pagbutyag sa kamatuoran ug pag-edukar sa publiko kabahin sa mga panghitabo sa palibot.
Kagahapon mihurar ang mga bag-ong opisyal sa Cebu Federation of Beat Journalists (CFBJ) atol sa tinuig nga panagtigum niini sa Laguna Garden Café sa Cebu Business Park, dakbayan sa Sugbo.
Si Elias Baquero sa Sun.Star Daily mao gihapon ang napiling presidente sa CFBJ. Si Baquero sulod sa lima ka tuig na kining naghupot sa maong katungdanan. Ang bise presidente mao si Joseph Tubelan sa Superbalita, Irene Seno-Cruz sa Cebu Daily News, kalihim, Juvy Taghoy-Gerodias sa Sun Star Daily, tresurera, Joy Tumulak sa Superbalita, auditor, Alex Badayos sa Sun.Star Daily, sergeant-at-arms. Mga board of directors mao sila si Gary Lao sa The Freeman, Ryan Borinaga sa Banat News, Jonas Panerio, Cebu Daily News, Marlon Bellita, DyAB Abante Bisaya ug Oscar Pineda sa Sun.Star Daily.
Ang CFBJ gilangkuban sa mga beat journalist sa nagkalain-laing media organization.
Ang mga media organization mao ang Capitol Association of Reporters in Trimedia (CART), City Hall Association of Reporters Media (CHARM), Sports Correspondents, Reporters and Editors (SCORE), Regional Journalist in Cebu (REJOICE), Cebu Economic Journalists Association (CEJA), Media Alliance for Law, Liberty, Equality and Truth (MALLET) Entertainment Group (E-Group) Association of Reporters in Mandaue and Lapu-Lapu in Truth and Equity (ARMALITE), Defense PNP Press Corp. (DEPP), Media in Cebu South (MICS) ug Lens.
Si Ricarido Borgonia, regional director sa Department of Education maoy mipahurar sa mga bag-ong napiling opisyales sa CFBJ. Usa sa mga kalihukan kagahapon mao ang pagtunol og mga pinansiyal nga hinabang kagahapon sa mga sakop sa media kinsa nabiktima sa sunog sa T. Padilla, dakbayan sa Sugbo niadtong buwan sa Agosto niining tuiga. Si Taghoy-Gerodias nga presidente sa DEPP mibutyag nga nakapundo sila og sobra sa P27 mil sa ilang gipahigayong fund raising alang sa mga sakop sa media nga nabiktima sa sunog.
Ang mga nakabenipisyo mao sila si Paul Lauro, Joel Pantino, Doming Cabarubias ug usa ka technician sa Y101 FM radio. - BANAT NEWS