CEBU, Philippines - Ang Parents-Teachers Community Association ug Konseho sa dakbayan sa Mandaue miawhag sa kapolisan sa pagpatuman sa ordinansa nga magsumpo sa sugal sa “kaka.”
Si Mandaue City Police Office director Sr. Supt. Noel Gillamac sa pakighinabi sa Banat News nagkanayon nga ang mga konsehal sa dakbayan sa Mandaue miawhag kaniya pag-monitor sa mga tunghaan nga adunay namaligya og kaka sa mga tinun-an.
Matud pa ni Gillamac nga buhi pa gihapon ang ordinansa nga napasar niadtong 2002. Kini nagmando sa kapolisan pagsumpo sa sugal pinaagi sa kaka.
Pipila usab ka kahugpongan sa mga ginikanan sa PTCA sa mga tunghaan mitawag sa ilang atensiyon pagsumpo niini.
Base sa reklamo sa mga ginikanan, ang balon sa ilang mga anak ipalit hinuon og kaka imbes ipalit og makaon.
Ang ubang kabataan dili na makasulod sa klase gumikan kay nalingaw sa pagpaaway sa kaka.
Gumikan niini, si Gillamac mimando sa iyang mga sakop sa matag presinto pagdakop sa mga namaligya og kaka sa Mandaue.
Ang kapolisan sa Station 5 adunay mga nasikop nga namaligya og kaka. Gipasakaan sila og kaso base sa ordinansa sa Mandaue.
Kahinumduman nga gumikan sa sugal sa kaka, usa ka kinabuhi ang nakalas sa dakbayan sa Sugbo human gipusil sa iyang gikataw-an nga pildero sa pustaanay sa kaka. Matud pa ni Gillamac dili siya buot nga maguba ang kaugmaon sa kabataan ug maoy hinungdan sa krimen ang pagpaaway sa kaka. - BANAT NEWS