Wa bayri sa nangutang naghikog

CEBU, Philippines - Usa ka ulitawo kinsa nalumsan sa kaguol gumikan kay may nangutang kaniya apan wala mobayad, naghikog sulod sa ilang balay didto sa sitio Ermita Proper, barangay Ermita , ning dakbayan sa Sugbo sa miaging gabii.

Si Ocianes Daniel Jr., 21, ulitawo nga taga Ermita Proper napalgang nagbitay sulod sa iyang lawak kansang liog gihiktan sa usa ka tumoy sa pisi nga nylon, nga ang pikas tumoy gigaid usab sa sagbayan sa ilang balay.

Ang iyang ig-agaw nga si Jacker Daniel, maoy unang nakakita sa naghikog ug nangayo kini og panabang sa mga silingan aron ikahatod kini ngadto sa tambalanan.

Apan gideklarar sa mga mananambal sa Cebu City Medical Center nga dead on arrival na si Daniel.

Si Genaro Libres, uyoan ni Daniel mitug-an sa mga tigbalita nga sa sayo pa ilang gikonsulta sa usa ka psychiatrist si Daniel gumikan sa hilabihang kaguol nga gibati niini.

Usa sa bug-at kaayong problema nga nasinati sa naghikog, mao ang kadako sa iyang kuwarta nga giutang sa iyang kauban sa trabaho sa barko nga wala gyud ilisi, sumala sa nasayran ni PO3 Geoffrey Libres sa Cebu City Police Office. – BANAT NEWS