84 ka paresan kaslon karon

CEBU, Philippines - Mopasiugda na usab og mass wedding ang kagamhanan sa dakbayan sa Sugbo karong adlawa alang sa 80 kapin ka magtiayon sa siyudad nga nag-ipon nga dili kasal.

Kini na maoy ikalima ka higayon nga ang City government mopasiugda og mass wedding alang sa kabus nga mga magtiayon nga dili makaabot og espesyal nga pagpakasal.

Mokabat ngadto sa 84 ka paresan   ang kaslon karong ala 1:00 sa hapon   diha sa Cebu Metropolitan Cathedral.

Ang mga kaslonon giagi og bug-at nga screening ug pipila sa mga gipangayo kanila mao nga kinahanglang nag-ipon na sila, labing minos lima ka tuig ug kinahanglang taga dakbayan gayud sila sa Sugbo.

Lakip usab sa mga gipangayo mao ang Birth Certificate, Cedula, Barangay Certificate, Cenomar, Baptismal ug Confirmation Certificate, Permit to Marry, ug uban pa.

Ang maong programa gidumala sa City Women and Family Affairs Commission nga gipangulohan ni Mila Satina nga ubos sa komitiba ni Konsehal Lea Japson.

Samtang gipadayag ni Mayor Michael Rama nga iyang gipasigarbo ang maong proyekto   ug himoon na gyud kini nga tinuig nga kalihukan.

Dugang pa niya nga mi-sponsor usab ang dakbayan sa gihimo nga nagkadaiyang seminar sa mga magtiayon ug moabaga usab ang City government sa gasto sa reception human sa kasal ug ang principal sponsor unya niini mao usab ang mga opisyal sa dakbayan nga gipangulohan ni Mayor Rama.  – BANAT NEWS